«Илья алты жасынан бастап ауыр атлетикамен айналысып келеді. Жастайынан зерек болып, кез-келген жағдайда алдына мақсат қоя біліп өсті. Ол – «алтын жігіт». Оның айғағы, осы уақытқа дейін қанша жарысқа қатысса да барлығында тек жеңімпаз атанумен келеді. Мәселен, 2001 жылы, 13 жасында спорт шеберінің нормативтерін толық орындап шығып, ел чемпионы атанды. 2002 жылы сол жетістігін қайта жаңартты. 17 жасында ерлер арасында әлем чемпионы атанды. Ал бір жыл өткен соң, Әлемнің екі дүркін жеңімпазы атанған болса, ауыр жарақаттарына қарамастан осы жылы Олимпиада шыңын бағындырды». Бұл мадақ сөз ауыр атлетикадан Қазақстан ұлттық құрамасының бас бапкері Алексей Нидің өз аузынан шыққан. Әшейінде, мақтауға сараң ол Илья елімізге Олимпиада алтынын алып бергенде өз-өзін ұстай алмай, өзі айтпақшы, «алтын жігіттен» мадақ сөзді аяай алмай қалды. Міне, бүгінгі тақырыбымызда өзінің мықтылығымен дүйім жұртты мойындатқан Сыр өңірінің толағай батыры туралы әңгімелеуді жөн көріп отырмыз.